Брэсцкі тэатр драмы рыхтуе прэм’еру спектакляў «Маскарад» і «Лэдзі Макбет Мцэнскага павета»
Фота bresttheatre.info
7 кастрычніка, Брэст . Брэсцкі акадэмічны тэатр драмы (БАТД) рыхтуе прэм’еру спектакля «Маскарад» паводле п’есы Міхаіла Лермантава. Аб гэтым паведаміла генеральны дырэктар установы культуры Ганна Сенькавец.
«Маскарад» у выкананні брэсцкіх артыстаў рыхтуе рэжысёрска-пастановачная група з Масквы. «Рэжысёрам з’яўляецца Сяргей Шчадрын. Мы з ім працавалі ўжо. У сакавіку 2024 года ў нас адбылася прэм’ера «Бацькі і дзеці» паводле аповесці Тургенева. Пастаноўка стала вынікам творчай лабараторыі ад Саюза тэатральных дзеячаў Расійскай Федэрацыі, — расказала Ганна Сенькавец. — Цяпер мы замахнуліся на вершаваную п’есу Лермантава. Артыстам даводзіцца асвойваць складаны паэтычны матэрыял. Хочам ажывіць класічны сюжэт, прыўнесці крыху новага ў наш тэатр, паспрабаваць вершаваную форму. Пастаноўка абяцае быць цікавай».
Для спектакля ствараюць дэкарацыі. У іх выкарыстоўваюць элементы з гісторыяй. Справа ў тым, што для пастаноўкі патрабаваліся фігуры слана і каня. Знайшліся яны ў Гродзенскай вобласці. У Лідскай ЖКГ спісалі старадаўнюю карусель. Брастаўчане звярнуліся да кіраўніцтва горада за садзейнічаннем у перадачы тэатру фігур, і такім чынам яны набылі другое жыццё.
У БАТД упэўнены, што спектакль спадабаецца як заўзятым тэатралам, так і тым, хто вырашыў нядаўна далучыцца да сцэнічнага мастацтва. «Гэта заклік да дыялогу з класікай, падстава для разважанняў», — адзначыла гендырэктар тэатра. Прэм’еру плануюць прадставіць публіцы ўжо ў канцы кастрычніка.
Чакаецца, што гэтай восенню гледачы горада над Бугам убачаць яшчэ адзін новы спектакль. Рэжысёр Цімафей Ільеўскі ставіць «Лэдзі Макбет Мцэнскага павета». «Задзейнічана амаль уся наша трупа. Дэкарацыі поўнасцю гатовы. Калі выпусцім «Маскарад», пачнём рэпетыцыі гэтага спектакля ў дэкарацыях. Да канца лістапада гледачы ўбачаць «Лэдзі Макбет Мцэнскага павета», — анансавала Ганна Сенькавец. Гэты спектакль таксама напоўнены глыбокім сэнсам. ацэнт зроблены на каханні і перыпетыях жаночага лёсу.
Таксама ў Брэсцкім акадэмічным тэатры драмы рыхтуюцца ў бліжэйшы час пачаць падрыхтоўку навагодняга спектакля. На сцэне пакажуць казку «Чарадзейная сіла».
