Ад старажытнасці да сучаснасці. Гід па «Ночы музеяў» у Брэсцкай вобласці
17 мая, Брэст . Брэсцкая вобласць далучаецца да акцыі «Ноч музеяў», у час якой наведвальнікі пазнаёмяцца з жамчужынамі фондавых калекцый і глыбей даведаюцца пра гісторыю,
У прыватнасці, гатовы здзіўляць Брэсцкі абласны краязнаўчы музей і яго філіялы. «Традыцыйна далучаемся да акцыі «Ноч музеяў». Мерапрыемствы будуць праходзіць у маі і пачатку чэрвеня. Пачынае гэты цыкл 17 мая наш філіял «Выратаваныя мастацкія каштоўнасці». У 18.00 будзе адкрыта выстава «Рускі імпрэсіянізм» з калекцыі Нацыянальнага мастацкага музея. Будуць прадстаўлены шэдэўры жывапісу, адбудзецца літаратурна-музычны вечар. Думаю, для наведвальнікаў, якія цікавяцца мастацтвам, будзе вельмі цікава”, — заўважыў дырэктар Брэсцкага абласнога краязнаўчага музея Аляксей Міцюкоў.
Непасрэдна ў самім краязнаўчым музеі (вуліца Карла Маркса, 60) акцыя адбудзецца 18 мая. Мерапрыемства атрымала інтрыгуючую назву «Ад мовы прыроды да мовы гісторыі». Госці змогуць наведаць розныя лакацыі, інтэрактыўныя пляцоўкі, паўдзельнічаць у квестах, акунуцца ў гісторыю Брэстчыны і ў цэлым пашырыць свае веды аб мінулым Беларусі. Рыхтуюцца музычныя і іншыя сюрпрызы, усіх сакрэтаў арганізатары не раскрываюць.
Эстафету 24 мая прыме яшчэ адзін філіял — Мастацкі музей. На яго плошчах адбудзецца адкрыццё выставы «Мастакі аб Вялікай Айчыннай вайне» ў рамках праекта «Музеі — гораду». Гэта сумесная праца з работнікамі мемарыяльнага комплексу «Брэсцкая крэпасць-герой», які прысвечаны 80-годдзю вызвалення Беларусі ад нямецка-фашысцкіх захопнікаў.
Гараджан і гасцей абласнога цэнтра ўвечары 25 мая запрашаюць на «Берасцейскую маёўку — 2024» у археалагічны музей «Бярэсце». Рэканструктары адновяць побыт сярэдневяковага горада, наведвальнікаў навучаць танцаваць старадаўнія танцы. Жадаючыя змогуць паўдзельнічаць у цікавых квестах, віктарынах і конкурсах. У гэты ж дзень у Камянецкай вежы правядуць квест «Пасвячэнне ў рыцары». Цырымонія пачнецца ў 18.00.
Завяршальнае мерапрыемства адбудзецца 7 чэрвеня зноў у Мастацкім музеі. Там пройдзе «Музейнік па-этнаграфічнаму». «Музейнік — наша брэндавае мерапрыемства, гэта адукацыйна-музычны вечар. Але на гэты раз аб’яднаем яго з праектам «Брэстчына этнаграфічная». Раскажам аб традыцыйнай народнай культуры. Наведвальнікі акунуцца ў поўны інтэрактыў», — паабяцаў Аляксей Міцюкоў.
Убачыць жамчужыну сваёй калекцыі прапануе музей гісторыі горада Брэста. Да акцыі «Ноч музеяў» прымеркавалі экспанаванне арыгінала Брэсцкай Бібліі. Яе перадаў у дар Прэзідэнт Беларусі ў час урачыстасцей у гонар 1000-годдзя горада ў верасні 2019 года. Біблія была выдадзена 4 верасня 1563 года ў Брэсцкай друкарні па загадзе і на грошы берасцейскага старасты, канцлера Вялікага Княства Літоўскага князя Мікалая Радзівіла Чорнага. Унікальнасць падоранага экзэмпляра ў тым, што ў ім захаваліся два гравіраваныя тытульныя лісты для Старога і Новага Запаветаў, а гэта вельмі рэдкая з’ява.
Аматараў прыроды чакаюць у нацыянальным парку «Белавежская пушча». Там 18 мая з 18.00 да 21.00 можна будзе бясплатна наведаць Музей прыроды, Археалагічны музей пад адкрытым небам і экскурсійныя вальеры з дзікімі жывёламі.
Паклоннікаў замкаў і даўніны, верагодна, зацікавіць прапанова Ружанскага палацавага комплексу. Там 18 мая ў 20.00 арганізуюць мерапрыемства «З легендаў і казак былых пакаленняў». Гасцей пазнаёмяць з тайнамі алхіміка, раскажуць аб рэстаўрацыі старадаўніх кніг. Жадаючыя і самі змогуць паспрабаваць свае сілы ў гэтым карпатлівым рамястве. Таксама будзе магчымасць далучыцца да гульні «Этнаграфічная спадчына», заданні якой прысвечаны беларускай народнай творчасці. Умельцы правядуць майстар-класы па саломапляценні, размалёўцы па шкле, выцінанцы. «У кожнага музея ёсць свая адметнасць. Нашы наведвальнікі могуць пагуляць па гістарычным месцы і адчуць яго энергію, убачыць, як ідзе рэстаўрацыя», — акцэнтавала ўвагу дырэктар Ружанскага палацавага комплексу Алена Кубарка.
