Беларускія весляры Талыка і Цыдзік перамаглі ў двойцы на ІІІ Гульнях краін СНД
Данііл Талыка і Іван Цыдзік. Фота Мінспорту
6 кастрычніка, Мінск . Беларускія прадстаўнікі акадэмічнага веславання заваявалі чатыры медалі на III Гульнях краін СНД, якія праходзяць у Азербайджане,
У другі і заключны дзень спаборніцтваў на канале ў Мінгечауры адбыліся два фіналы. У юніёраў да 18 гадоў перамогу ў двойцы атрымалі нашы Данііл Талыка і Іван Цыдзік, якія пераадолелі паўтара кіламетра за 4 мін. 53,980 сек. Сярэбраных прызёраў з Узбекістана беларусы апярэдзілі на восем секунд.
У гэтым жа відзе праграмы ў моладзі да 20 гадоў беларусы Мікіта Шаршнёў і Дзмітрый Серабро паказалі другі рэзультат (04.52,690), уступіўшы толькі ўзбекскім веслярам. Такім чынам, нашы спартсмены заваявалі медалі ў кожным з чатырох фіналаў у акадэмічным веславанні: напярэдадні ў спаборніцтвах адзіночак Данііл Талыка (U18) стаў мацнейшым, а Дзмітрый Серабро (U20) заняў трэцяе месца.
III Гульні краін СНД прымаюць сем гарадоў — Гянджа, Еўлах, Мінгечаур, Габала, Шэкі, Гёйгёль і Ханкэнды. Міжнародны форум сабраў больш за 1600 атлетаў да 23 гадоў з Азербайджана, Беларусі, Расіі, Узбекістана, Казахстана, Таджыкістана, Кыргызстана, Туркменістана, Турцыі, Кубы, Кувейта, Пакістана і Амана. У склад нашай дэлегацыі ўвайшоў 241 атлет у 21 дысцыпліне. Цырымонія закрыцця гульняў адбудзецца 8 кастрычніка.
