Ці можна галасаваць, калі 18 гадоў спаўняецца 25 лютага. ЦВК аб новым механізме фарміравання спісаў
1 лютага, Мінск . У праекце БЕЛТА
«Краіна гаворыць» намеснік начальніка аддзела прававой, аналітычнай і
метадычнай работы апарату Цэнтральнай выбарчай камісіі Іван Толкач расказаў, ці
можа малады чалавек, якому 25 лютага спаўняецца 18 гадоў, прагаласаваць у
адзіны дзень галасавання.
«У чалавека, якому 25 лютага спаўняецца 18
гадоў, ёсць права прагаласаваць. Ён будзе ў спісах выбаршчыкаў, таму што цяпер
прымяняецца новы механізм іх фарміравання. Раней браліся спісы мінулай
кампаніі, выбары гэта ці рэферэндум, і праводзілася работа па іх удакладненні, гэта
пакватэрны абход ці абзвон. Члены ўчастковых камісій праводзілі работу па
верыфікацыі гэтых спісаў», — сказаў Іван Толкач.
Цяпер у Выбарчы кодэкс унеслі норму, згодна з якой
спісы складаюцца на аснове рэгістра насельніцтва і іншых баз даных. Там
знаходзяцца неабходныя звесткі аб грамадзянах, якія патрэбны для фарміравання
спісаў. «Сфарміраваўшы нашы ўчасткі для галасавання і апісаўшы іх
электронна, мы маем магчымасць падаць гэтыя звесткі на рэгістр насельніцтва,
каб атрымаць спісы выбаршчыкаў. Што і было зроблена. Спісы сфарміраваны і
паступілі ў рэгіёны. Цяпер ідзе работа па іх удакладненні», — падкрэсліў
Іван Толкач.
Вяртаючыся да пытання аб тым, ці можа галасаваць
малады чалавек, якому 18 гадоў спаўняецца 25 лютага, ён адзначыў, што ў спісе
выбаршчыкаў у адносінах да тых грамадзян, якія дасягнуць паўналецця ў гэтым
годзе, будзе не год, а дата нараджэння: «У спісе будзе не год, а дата.
Камісія бачыць, што чалавеку спаўняецца 18 гадоў 25 лютага і ён мае права
галасаваць. А вось калі ён прыйдзе на датэрміновае галасаванне, то такой
магчымасці ў яго не будзе, таму што 18 гадоў яму яшчэ не споўнілася».
*Праект створаны за кошт сродкаў мэтавага збору на
вытворчасць нацыянальнага кантэнту.
