Гісторыя тэатра праз прызму падзей. Унікальная выстаўка адкрылася ў Купалаўскім
8 верасня, Мінск . У сценах Нацыянальнага акадэмічнага тэатра імя Янкі Купалы адкрылася ўнікальная выстаўка, арганізаваная ў супрацоўніцтве з Нацыянальным архівам Беларусі,
Генеральны дырэктар тэатра Аляксандр Шастакоў адзначыў, што выстаўка ўключае разнастайныя дакументы, якія расказваюць унікальную гісторыю тэатра праз прызму падзей. «Гэтыя дакументы даюць магчымасць зазірнуць у мінулае і ўбачыць, што тэатр жыў і развіваўся», — дадаў ён.
Аляксандр Шастакоў таксама згадаў адзін з дакументаў, які сведчыць, што ў час Вялікай Айчыннай вайны грошы, сабраныя тэатрам ад спектакляў, былі перададзены рабочым завода для будаўніцтва самалёта. Сярод прадстаўленых матэрыялаў можна прасачыць і творчы шлях такіх дзеячаў, як Стэфанія Станюта і Уладзімір Уладамірскі. Кожны экспанат можна доўга разглядаць, учытваючыся ў словы і супастаўляючы факты.
Выстаўку прадставіў і дырэктар Нацыянальнага архіва Рэспублікі Беларусь Андрэй Дземянюк. Ён расказаў, што сёння ў тэатры выстаўлена больш як 30 дакументаў, якія раней былі невядомы шырокай публіцы. «Мы пастараліся адабраць найбольш цікавыя матэрыялы. Паверце, фонд велізарны, і прадставіць усе дакументы ў рамках адной экспазіцыі немагчыма, таму мы перадалі значную частку матэрыялаў у тэатр для далейшага выкарыстання ў выставачнай дзейнасці», — падзяліўся ён.
Андрэй Дземянюк падкрэсліў, што задача архівістаў заключаецца не толькі ў захаванні дакументаў, але і ў забеспячэнні шырокага доступу да іх. «Мы рэалізуем гэта праз выставачную і выдавецкую дзейнасць. Таму нам прыемна праводзіць такую работу, асабліва калі яна падтрымліваецца нашымі партнёрамі, як у гэтым выпадку», — адзначыў дырэктар.
Складаннем выстаўкі займалася загадчыца аддзела Нацыянальнага архіва Маргарыта Старасценка. Яна таксама правяла для гасцей адкрыцця невялікую экскурсію і адзначыла, што кожны дакумент — гэта новае адкрыццё. «Калі мы адбіралі матэрыялы, супрацоўнікі тэатра прыйшлі да нас, і для іх гэта было сапраўдным адкрыццём. Цікавасць да дакументаў вялікая, асабліва да тых, якія апісваюць, як выглядалі сцэна, уваход і многае іншае», — дадала яна.
Маргарыта Старасценка таксама расказала адну з гісторый з жыцця тэатра: «З дакументаў, якія датычацца ваеннага жыцця, мы даведаемся аб тым, што тэатр не проста рэпеціраваў п’есы, а сапраўды ездзіў у ваенныя часці. Як пішацца ў справаздачах, яны выступалі перад салдатамі. Напрыклад, за перыяд з 9 па 24 чэрвеня далі 65 спектакляў, паказы праходзілі амаль кожны дзень па некалькі разоў. Гэтыя спектаклі настолькі натхнялі байцоў, што кожны раз яны ператваралі паказ у «мітынг» — плакалі над спектаклямі, успаміналі родны дом і сваіх блізкіх. Гэтыя спектаклі сталі сувязным звяном паміж вайной і мірным жыццём, салдатамі і тымі, хто застаўся далёка».
Акрамя таго, на выстаўцы прадстаўлены эскізы касцюмаў, макеты і розныя тэатральныя прадметы. Выстаўка праводзіцца пры садзейнічанні Музея гісторыі тэатральнай і музычнай культуры.
