Беларусь і Ліга арабскіх дзяржаў выступілі за пашырэнне супрацоўніцтва
Фота МЗС
16 лютага, Мінск . Беларуская дэлегацыя на чале з намеснікам міністра замежных спраў Яўгенам Шэстаковым 14-15 лютага зрабіла рабочы візіт у Егіпет. Аб гэтым паведамілі ў прэс-службе МЗС.
У Каіры быў праведзены чарговы раўнд палітычных кансультацый паміж міністэрствамі замежных спраў Беларусі і Егіпта. Бакі абмеркавалі шляхі актывізацыі беларуска-егіпецкага супрацоўніцтва — перспектыўныя напрамкі ўзаемадзеяння ў палітычнай, гандлёва-эканамічнай, турыстычнай і гуманітарнай сферах, а таксама актуальныя пытанні рэгіянальнага парадку дня.
Дыпламаты разгледзелі магчымасці развіцця дагаворна-прававой базы двухбаковых адносін. Падкрэслена актыўнае ўзаемадзеянне Беларусі і Егіпта ў міжнародных арганізацыях.
У час рабочага візіту Яўген Шэстакоў сустрэўся з намеснікам генеральнага сакратара Лігі арабскіх дзяржаў па міжнародных палітычных пытаннях Халедам Манзлаві. Абмяркоўвалася пытанне актывізацыі ўзаемадзеяння. Бакі разгледзелі, у прыватнасці, актуальныя праблемы Блізкага Усходу і Усходняй Еўропы для каардынацыі сваіх пазіцый.
«Субяседнікі падкрэслілі важнасць пашырэння супрацоўніцтва Беларусі з арабскімі краінамі, асабліва па тэматыцы забеспячэння харчовай бяспекі. У час сустрэчы перададзена пасланне міністра замежных спраў Беларусі Сяргея Алейніка, адрасаванае генеральнаму сакратару Лігі арабскіх дзяржаў Ахмеду Абуль Гейту», — расказалі ў ведамстве.
Намеснік міністра замежных спраў таксама правёў сустрэчу з прадстаўнікамі егіпецкага бізнесу, у час якой абмеркаваны канкрэтныя механізмы актывізацыі гандлёва-эканамічнага супрацоўніцтва Беларусі і Егіпта.
