«Паміж мінулым і будучым». Выставу да 50-годдзя БДУКіМ адкрылі ў галерэі «Універсітэт культуры»
Фота галерэі «Універсітэт культуры»
8 кастрычніка, Мінск . Выставачны праект «Паміж мінулым і будучым: грані адзінства», прымеркаваны да 50-гадовага юбілею Беларускага дзяржаўнага ўніверсітэта культуры і мастацтваў, прадставілі ў мастацкай галерэі «Універсітэт культуры»,
У экспазіцыю ўвайшлі работы, створаныя ў разнастайных тэхніках дэкаратыўна-прыкладнога мастацтва (кераміка, ткацтва, вышыўка, саломапляценне, батык), а таксама жывапісныя і графічныя творы. Кожны экспанат — гэта ўнікальнае спалучэнне народнага духу і аўтарскага пошуку, дзе скрозь прызму сучаснага мастацтва праступаюць вечныя каштоўнасці.
«Фарміраванне гэтай экспазіцыі стала для нас натхняльным працэсам. Пры арганізацыі прасторы мы імкнуліся прэзентаваць работы выдатных майстроў і маладых аўтараў такім чынам, каб яны ўступілі ў творчы дыялог і ўяўлялі сабой пэўнае сэнсавае, культурнае поле. Паколькі менавіта ў няспынным дыялогу паміж эксперыментам і традыцыямі, выкладчыкамі і студэнтамі ўтвараецца творчае асяроддзе, дзе і зараджаецца будучае сучаснага беларускага мастацтва», — сказала дырэктар галерэі «Універсітэт культуры» Марына Татарэвіч.
Яна дадала, што адметнасцю экспазіцыі з’яўляюцца работы выкладчыкаў, якія стаялі ля вытокаў стварэння кафедры дэкаратыўна-прыкладнога мастацтва і самой галерэі. Сярод іх Тамара Васюк, Ала Непачаловіч, Уладзімір Рынкевіч, Рыгор Шаура.
«Гэта вопытныя майстры, чые работы з’яўляюцца неад’емнай часткай спадчыны БДУКМ і заслугоўваюць асаблівай увагі. Іх педагагічная і мастацкая дзейнасць стала фундаментам для фарміравання прафесійных кампетэнцый новага пакалення мастакоў», — растлумачыла рэктар БДУКМ Наталля Карчэўская.
У той жа час творы студэнтаў, на яе думку, дапамагаюць традыцыйнаму майстэрству набыць сучаснае гучанне, дзе ў ткацтве пераасэнсоўваюцца нацыянальныя арнаменты, а ў кераміцы нараджаюцца актуальныя формы.
У час работы выставы таксама будуць арганізоўвацца майстар-класы і пройдуць творчыя сустрэчы, якія пакажуць, наколькі разнастайная дзейнасць кафедры дэкаратыўна-прыкладнога мастацтва. Экспазіцыю можна ўбачыць да 1 лістапада.
