Бельская: пагарджанне прынцыпамі роўнасці і неўмяшання ва ўнутраныя справы контрпрадукцыйнае
Фота з архіва
12 верасня, Мінск . Пагарджанне прынцыпамі суверэннай роўнасці і неўмяшання ва ўнутраныя справы контрпрадукцыйнае. Такі пункт гледжання выказала пастаянны прадстаўнік Беларусі пры Аддзяленні ААН у Жэневе Ларыса Бельская на 60-й сесіі Савета па правах чалавека ў час агульных дэбатаў па глабальным аглядзе Вярхоўнага камісара, са спасылкай на Пастаяннае прадстаўніцтва Беларусі пры Аддзяленні ААН і іншых міжнародных арганізацыях у Жэневе.
«Падзяляем заклапочанасць тэндэнцыямі мілітарызацыі знешняй палітыкі, распальвання нянавісці, сістэмнага расізму, парушэння правоў бежанцаў і мігрантаў, — заявіла беларускі дыпламат, паставіўшы шэраг пытанняў. — Як маніторынг УВКПЧ за выбарамі ў краінах, якія сталі на шлях развіцця, суадносіцца з мандатам і паўнамоцтвамі Упраўлення? Ці ажыццяўляе УВКПЧ маніторынг за выбарчымі кампаніямі ў заходніх дзяржавах, дзе мелі месца скандалы з праследаваннем і адхіленнем кандыдатаў?»
«Лічым некарэктным проціпастаўленне праваабарончых механізмаў легітымнай дзяржаўнай уладзе, а дзяржавы — сваім народам, — адзначыла Ларыса Бельская. — Некансэнсусныя механізмы ствараюцца ў Савеце выбарачна, адпаведна перавагам пэўнай групы краін, каб аказваць націск на непажаданыя ўрады. Гэтыя механізмы становяцца часткай геапалітычных гульняў, кампаній па дэзынфармацыі, а таксама нападак вядомай групы краін на Беларусь, Кітай, Расію і іншыя дзяржавы, з мэтай змянення іх курсу».
«Няўжо даклады гэтых механізмаў дапамаглі спыніць хоць адзін канфлікт, і прадухіліць гібель насельніцтва? — задала яна пытанне. — Не, таму што пагарджанне прынцыпамі суверэннай роўнасці і неўмяшання ва ўнутраныя справы контрпрадукцыйнае і безвыніковае, як і ігнараванне ролі і намаганняў урадаў ва ўрэгуляванні крызісных сітуацый, абароне правоў чалавека на месцах».
«Мір і бяспека залежаць не толькі ад прыхільнасці ўрадаў да правоў чалавека, але, у першую чаргу, ад паважання права народаў выбіраць шлях развіцця сваіх дзяржаў без знешняга ўмяшання, а таксама здольнасці міжнародных інстытутаў, уключаючы Савет па правах чалавека, умацоўваць шматбаковасць на аснове ўліку і балансу інтарэсаў краін і народаў», — заявіла пастаянны прадстаўнік Беларусі.
