Вальфовіч пра «Дажынкі»: гэта свята — яскравы прыклад з’яднанасці і адзінства беларускага народа
20 верасня, Ваўкавыск . Уборачная кампанія, якая аб’яднала людзей розных прафесій, яшчэ раз паказала, што беларусы адзіныя ва ўсіх важных справах. Аб гэтым заявіў дзяржаўны сакратар Савета бяспекі Аляксандр Вальфовіч на фестывалі-кірмашы працаўнікоў вёскі ў Ваўкавыску,
Настрой сённяшняга свята адлюстроўвае надвор’е, адзначыў Аляксандр Вальфовіч. Яно адпавядае тым пачуццям, якія адчуваюць нашы хлебаробы, аграрыі Гродзенскай вобласці, дзе сёння адзначаецца фестываль «Дажынкі».
«Гэта адно з самых любімых у краіне, самых шануемых асенніх свят на нашай зямлі, — падкрэсліў дзяржсакратар Савета бяспекі. — Яго гісторыя ідзе ўглыб стагоддзяў. За час развіцця нашай краіны як суверэннай, незалежнай дзяржавы свята набыло асаблівыя фарбы, асаблівыя рысы. Яно стало сімвалам падвядзення вынікаў уборачнай кампаніі. Гэта свята не толькі паказвае вынікі ўборачнай, яно асацыюецца з утульнасцю і дабром, з душой беларускага народа. «Дажынкі» ўвасабляюць нашу беларускую культуру і традыцыі. У той жа час паказваюць, наколькі цяжкая праца хлебароба».
Як падкрэсліў Аляксандр Вальфовіч, прайшоўшы па падворках раёнаў Гродзеншчыны, убачыўшы, колькі ўсяго зроблена, колькі зароблена сваёй працай, адчуваеш гонар і захапленне. «Прырода дала нам свае дары не проста так, — сказаў ён. — За гэтым стаіць праца жыхароў усёй Гродзенскай вобласці. Гродзеншчына заўсёды славілася высокімі ўраджаямі, і за гэтым стаіць вялікая праца».
«Сімвалічна, што тут мы бачым не толькі аграрыяў, — дадаў дзяржсакратар Савета бяспекі. — Мы бачым людзей у пагонах, якія ўнеслі свой уклад на жніве. Напрыклад, ваеннаслужачыя, якія прымалі ўдзел ва ўборцы, перавезлі 115 тыс. т збожжа. Разам з аграрыямі працавалі супрацоўнікі міліцыі, МНС. Акрамя падтрымання парадку, у свабодны час яны садзіліся на камбайны і трактары. Гэта адзін з прыкладаў нашага адзінства. Фестываль хлебаробаў якраз і паказвае, што мы ўсе адзіныя. Трэба ўбіраць збожжа — мы разам, расчышчаць лясы пасля непагоды — мы таксама разам. І калі хтосьці замахнецца на нашу свабоду і незалежнасць, мы ўсім светам, як адзін, станем на абарону нашай Айчыны».
Беларускі народ — з’яднаны, душэўны, добры. Усё гэта ўвасабляе сённяшняе свята, рэзюмаваў Аляксандр Вальфовіч.
