Для падтрымкі інвестпраектаў. У Нацбанку растлумачылі новаўвядзенні ў пераліку фінансавых інструментаў
29 кастрычніка, Мінск . Аб тым, якія новыя правілы ўводзяцца ў Беларусі ў крэдытаванні юрыдычных асоб, расказаў журналістам першы намеснік старшыні праўлення Нацыянальнага банка Аляксандр Ягораў, .
Нацыянальны банк з 1 лістапада змяняе пералік фінансавых інструментаў крэдытна-дэпазітнага рынку, па якіх устанаўліваюцца значэнні разліковых велічынь стандартнай рызыкі (РВСР). У прыватнасці, іх будуць асобна зацвярджаць па інвестыцыйных і звычайных камерцыйных крэдытах для юрыдычных асоб.
«На працягу 2025 года мы паслядоўна вялі і банкі, і юрыдычных асоб да таго, што асноўнай задачай Нацбанка з пункту гледжання крэдытавання будзе перш за ўсё падтрымка інвестыцыйнага крэдытавання. У маі мы ўводзілі разліковыя велічыні стандартнай рызыкі для крэдытаў з тэрмінам большым за тры гады. Гэта была такая апраксімацыя інвестыцыйных крэдытаў. Практычна паўгода вялі работу, каб выбудаваць сістэму разліку аб’ёму інвестыцыйных крэдытаў, верыфікаваць статыстыку», — расказаў Аляксандр Ягораў.
Ён дадаў, што атрыманы поўныя даныя па выдачы інвесткрэдытаў — па банках, стаўках. «Адпаведна, цяпер маем магчымасць давесці паказчык РВСР канкрэтна па інвестыцыйных крэдытах. Перайшлі ад той схемы, якая была раней (зацвярджэння РВСР асобна для крэдытаў з тэрмінам большым за тры гады і меншым за тры гады), да практыкі менавіта інвестыцыйнага крэдытавання, гэта значыць цяпер будзем мець дзве велічыні РВСР», — растлумачыў Аляксандр Ягораў.
Так, для інвестыцыйных крэдытаў РВСР крыху зніжаецца ў параўнанні з той, якая была да лістапада, і складзе 12 працэнтаў. Для астатніх крэдытаў (за выключэннем ільготных і інвестыцыйных) — 13,13 працэнта гадавых.
«Што датычыцца астатніх велічынь, перш за ўсё спажывецкіх крэдытаў і дэпазітаў з тэрмінам большым за адзін год у беларускіх рублях, то яны не памяняліся. Больш таго, каб банкі маглі доўгатэрмінова выбудоўваць сваю стратэгію ставак, гэтыя велічыні ўстанавілі адразу на два месяцы — лістапад і снежань», — сказаў Аляксандр Ягораў.
З аднаго боку, такое рашэнне дасць магчымасць банкам больш правільна выбудоўваць працэнтную палітыку. З пункту гледжання юрыдычных асоб, яны атрымаюць прадказальную палітыку з боку банкаў і змогуць не спяшацца з падачай заявак, калі нейкія дакументы не гатовы, разумеючы, што ў снежні ўзровень ставак будзе адпавядаць лістападаўскаму значэнню.
Аляксандр Ягораў падкрэсліў, што для любога бізнесу заўсёды важна прадказальнасць. Чым менш змяненняў, чым больш паслядоўна праводзіцца палітыка, тым прасцей працаваць, разлічваць бізнес-планы. «У выніку павінны бачыць рост колькасці інвестыцыйных праектаў, якія будуць рэалізоўвацца ў краіне», — сказаў ён.
Як паведамлялася, на лістапад — снежань 2025 года рашэннем праўлення Нацыянальнага банка ўстаноўлены наступныя значэнні разліковых велічынь стандартнай рызыкі: для новых тэрміновых безадзыўных банкаўскіх укладаў (дэпазітаў) фізічных асоб з тэрмінам вяртання большым за адзін год — 15,64 працэнта гадавых; для новых інвестыцыйных крэдытаў, прадастаўленых юрыдычным асобам (за выключэннем ільготных), — 12 працэнтаў гадавых; для новых крэдытаў, прадастаўленых юрыдычным асобам (за выключэннем ільготных, інвестыцыйных), — 13,13 працэнта гадавых; для новых крэдытаў, прадастаўленых фізічным асобам (за выключэннем ільготных), — 19,10 працэнта гадавых.
Прынятае рашэнне накіравана на павелічэнне банкамі інвестыцыйнага фінансавання эканомікі.
