Гомель і Віцебск прымуць стартавыя матчы 19-га тура футбольнага чэмпіянату Беларусі
Фота з архіва
22 жніўня, Мінск . Двума паядынкамі адкрыецца 19-ы тур футбольнага чэмпіянату Беларусі сярод каманд вышэйшай лігі,
У стартавым матчы сённяшняга дня футбалісты «Гомеля» прымуць у сябе дома барысаўскі БАТЭ (пачатак гульні ў 19.00). У першым крузе ў Барысаве сапернікі разышліся мірам — 0:0. На мінулым тыдні гамяльчане пацярпелі трэцяе паражэнне запар, прайграўшы ў Мазыры мясцовай «Славіі» (1:2), а барысаўчане перапынілі зацяжную серыю няўдач, перамогшы на сваёй арэне футбалістаў «Маладзечна» (2:1). У другой сустрэчы лідар першынства «МЛ Віцебск» згуляе на сваім полі з наваполацкім «Нафтанам» (пачатак у 20.55; прамая трансляцыя на тэлеканале «Беларусь 5»). У Наваполацку віцябчане разграмілі гаспадароў з лікам 3:0, а ў мінулым туры згулялі ўнічыю з брэсцкім «Дынама» (1:1) і застаюцца адзінай камандай, не прайграўшай ніводнага матчу ў гэтым чэмпіянаце. Новапалачане пасля двух фіяска запар у мінулы ўік-энд нечакана атрымалі значную перамогу над футбалістамі «Віцебска» (3:0) і не маюць намеру спыняцца на дасягнутым.
Заўтра адбудуцца яшчэ тры гульні: «Смаргонь» — «Дынама» (Брэст), «Маладзечна» — «Мінск», «Арсенал» (Дзяржынск) — «Тарпеда-БелАЗ» (Жодзіна). У нядзелю, 24 жніўня, пройдуць дзве сустрэчы. У цэнтральным паядынку гэтага тура мінскае «Дынама», якое ідзе трэцім, прыме «Славію», што займае другую пазіцыю ў турнірнай табліцы. «Іслач» з Мінскага раёна будзе сапернічаць з «Віцебскам». Матч «Слуцк» — «Нёман» (Гродна) перанесены на больш позні тэрмін.
Становішча ў лідзіруючай групе цяпер такое: «МЛ Віцебск» — 46 ачкоў (18 матчаў), «Славія» (Мазыр) — 38 (18), «Дынама» (Мінск) — 32 (16), «Дынама» (Брэст) — 32 (18). Спіс лепшых бамбардзіраў узначальвае нападаючы «Іслачы» Аляксандр Шасцюк, які забіў 12 мячоў, на два галы менш забіў Андрэй Салавей са «Славіі».
