Віцэ-спікер польскага Сейма заклікаў адкрыць граніцу з Беларуссю
Фота з архіва
23 верасня, Мінск /Кар. БЕЛТА/. Віцэ-спікер польскага Сейма, кіраўнік партыі «Нацыянальны рух» Кшыштаф Босак заклікаў адкрыць граніцу з Беларуссю, заявіўшы, што з-за рашэння польскіх улад церпяць транспартныя кампаніі краіны. Відэазаява апублікавана ў сацсетках партыі.
«Чым больш мы закрываем граніцы з Усходам, тым больш мы пераводзім прыбытак ад лагістыкі ў іншыя краіны, — звярнуў увагу палітык. — Сітуацыя закрыцця граніцы не ўплывае на рух тавараў. Рух і так ідзе праз балтыйскія краіны».
Ён лічыць, што, прымаючы рашэнне аб закрыцці граніцы, урад павінен быў улічваць, што першымі пацерпяць польскія транспартныя кампаніі. Дадатковыя апасенні, як адзначыў палітык, выклікае той факт, што гэтае раптоўнае рашэнне пакінула больш за 1 тыс. польскіх транспартных сродкаў на беларускім баку без магчымасці вярнуцца. «Цяжка паверыць, што польскія грузавікі і польскія грамадзяне аказаліся ў заложніках рашэннем польскага ўрада», — сказаў Босак. Ён дадаў, што страты ад прастою ў Беларусі аднаго польскага грузавіка складаюць 1 тыс. еўра ў дзень.
Паводле яго слоў, польскія ўлады далі перавозчыкам усяго два дні на тое, каб пакінуць тэрыторыю Беларусі. Ён падкрэсліў, што Польшча не можа быць закрыта для ўласных грамадзян і «быць для іх мачахай».
Босак патрабуе ад польскага ўрада адкрыць граніцу з Беларуссю. «Урад павінен прызнаць свае памылкі і адкрыць граніцу для вяртання грузавікоў дадому. Гэты абсурд павінен закончыцца», — сказаў віцэ-спікер.
У сваю чаргу, як паведамляе РІА Навіны, дэпутат Сейма Вітольд Тумановіч заявіў, што закрыццё граніцы з Беларуссю ўдарыла не толькі па перавозчыках. «Да нас звяртаюцца не толькі перавозчыкі. Многія прадпрымальнікі хочуць атрымаць тавары, адправіць тавары. Яшчэ крыху — і яны будуць вымушаны звальняць работнікаў», — падкрэсліў ён.
Прадстаўнік Камітэта абароны прадпрымальнікаў Рафал Меконг прадэманстраваў спіс польскіх грузавікоў, зарэгістраваных на выезд з Беларусі. «На гэты момант гэта 1039 машын. Лічба 1,5 тыс., якую дае беларускі бок, з’яўляецца праўдападобнай, паколькі рэгістрацыя ў чарзе звязана з аплатай, а некаторыя перавозчыкі, не ведаючы, ці змогуць выехаць, не спяшаюцца плаціць за гэта», — растлумачыў ён.
Польшча ў ноч на 12 верасня закрыла граніцу з Беларуссю. Польскі прэм’ер Дональд Туск абгрунтаваў рашэнне закрыць граніцу «інтарэсамі бяспекі», растлумачыўшы гэта пачаткам актыўнай фазы расійска-беларускіх ваенных вучэнняў «Захад-2025». Вучэнні праходзілі з 12 да 16 верасня. Калі Польшча адкрые граніцу, пакуль невядома.
Паводле даных Дзяржаўнага мытнага камітэта, на беларускай тэрыторыі засталіся 1453 грузавыя транспартныя сродкі, якія не паспелі выехаць з краіны. Іх выезд магчымы толькі праз беларуска-польскі ўчастак граніцы. Паколькі заканчваўся тэрмін іх часовага ўвозу на тэрыторыю ЕАЭС, Дзяржаўны мытны камітэт Беларусі прыняў рашэнне прадоўжыць яшчэ на 10 дзён знаходжанне польскіх фур на тэрыторыі краіны.-0-
