Выстава «Хараство Пакістана: мастацкая спадчына» адкрылася ў Нацыянальнай бібліятэцы
14 чэрвеня, Мінск . Выстава «Хараство Пакістана: мастацкая спадчына», прымеркаваная да Дня Незалежнасці Ісламскай Рэспублікі Пакістан, 13 чэрвеня адкрылася ў галерэі «Атрыум» Нацыянальнай бібліятэкі Беларусі, 
Выстава ўяўляе сабой увасобленае ў жывапісе і дэкаратыўным мастацтве хараство Пакістана — шматнацыянальнай, шматкультурнай і і шматмоўнай краіны, нацэлена папулярызаваць пакістанскае мастацтва, яе своеасаблівасць сярод жыхароў Беларусі і турыстаў.
У экспазіцыі — работы выдатных пакістанскіх мастакоў: Аміра Камаля, Аішы Камаль, Эрума Ашфака і Фарын Канваль. Сусветна вядомы Амір Камаль прадстаўляе традыцыйную арабскую каліграфію. Творчасць Аішы Камаль вызначаецца глыбокім сімвалізмам дэталей шрыфтавых кампазіцый. Пейзажы і архітэктурныя вобразы Эрума Ашфака пазнаёмяць гледачоў з цудамі культуры Пакістана. Мэта работ Фарын Канваль — увасобіць успаміны, моманты, працаваць з падсвядомасцю і эмоцыямі ў жывапісе.
Дапаўняюць экспазіцыю традыцыйныя прадметы побыту — прыклады дэкаратыўнага пакістанскага мастацтва: керамічныя вазы, сталовыя прыборы, расшытыя арнаментамі сумкі, вырабы з медзі, адзенне, пакістанскія фургончыкі «truckart», дэкаратыўныя ўпрыгажэнні з оніксу і іншыя экспанаты. Маляўнічыя арнаменты вырабаў даюць уяўленне аб яркім каларыце культуры Пакістана.
Жывапіс, фатаграфіі краявідаў Пакістана, прадметы дэкаратыўнага мастацтва паказваюць гледачу экзатычную краіну ва ўсім яе харастве, у своеасаблівасці традыцый яе жыхароў, даюць магчымасць даведацца аб іх побыце і культуры. Экспазіцыя пазнаёміць з вядомымі мастакамі, дасць магчымасць адчуць разнастайнасць і глыбіню пакістанскай культуры, асаблівую вернасць традыцыям.
У адкрыцці экспазіцыі прынялі ўдзел Надзвычайны і Паўнамоцны Пасол Пакістана ў Беларусі Саджад Хайдэр Хан, першы намеснік міністра замежных спраў Беларусі Сяргей Лукашэвіч, першы намеснік старшыні Мінгарвыканкама Надзея Лазарэвіч, дырэктар Нацыянальнай бібліятэкі Вадзім Гігін, замежныя дыпламаты, прадстаўнікі творчай супольнасці краіны.
У канцэртнай праграме было выступленне беларускай спявачкі Таццяны Крэміс, якая выканала песню на ўрду «Вялікая адлегласць», а таксама інструментальная пакістанская кампазіцыя ў выкананні выкладчыкаў Беларускай дзяржаўнай гімназіі-каледжа пры акадэміі музыкі Ксеніі Бельцюковай і Івана Звягіна.
Для мінчан і гасцей сталіцы выстава будзе адкрыта 14-26 чэрвеня.
Фота Раміля Насібуліна
