У час рэспубліканскага суботніка сабрана Br14,5 млн
20 красавіка, Капыльскі раён . Паводле аператыўных даных, у рэспубліканскім суботніку прынялі ўдзел 2,4 млн чалавек, сабрана каля Br14,5 млн. Аб гэтым заявіў журналістам намеснік прэм’ер-міністра Пётр Пархомчык,
«На гэты момант у цудоўным свяце працы ўдзельнічаюць 2,4 млн чалавек. Упэўнены, што гэта лічба павялічыцца. Што датычыцца грашовых сродкаў, якія паступілі ў Міністэрства фінансаў, то яны склалі Br14,5 млн», — адзначыў Пётр Пархомчык. Паводле яго слоў, гэта на Br400 тыс. больш, чым у мінулым годзе.
«Ва ўсіх добры настрой. Усе выйшлі вялікімі калектывамі. Напрыклад, Міністэрства прамысловасці сёння на «Інтэграле» высаджвае алею, прысвечаную 30-годдзю Мінпрама, удзельнічаюць усе дырэктары холдынгаў, — дадаў віцэ-прэм’ер. — Раней Міністэрства лясной гаспадаркі аб’явіла акцыю «Адновім лясы разам!». У ёй прынялі ўдзел больш за 80 тыс. чалавек».
Кіраўніцтва ўрада на чале з прэм’ер-міністрам Раманам Галоўчанкам 20 красавіка працуе на рэспубліканскім суботніку ў Мінскай вобласці. Яны займаюцца пасадкай сеянцаў дуба на ўчастку ляснога фонду Колаўскага лясніцтва Капыльскага доследнага лясгаса. Перад пачаткам работ прэм’ер-міністр, яго намеснікі і кіраўнік Апарату Саўміна высадзілі 18 туй у месцы няроўнага бою 18 партызан з нямецка-фашысцкімі захопнікамі паблізу вёскі Лавы Капыльскага раёна.
У канцы 1942 года нямецкія войскі разгарнулі карную экспедыцыю супраць партызан Капыльскага, Уздзенскага і Нясвіжскага раёнаў Мінскай вобласці. У снежні 7 тыс. фашыстаў з танкамі, гарматамі і мінамётамі пачалі наступленне на брыгаду імя Варашылава. Каб паспець эвакуіраваць параненых і сканцэнтраваць сілы для вырашальнага бою, адзін з атрадаў пад камандаваннем Вікенція Драздовіча вырашана было перакінуць на абарончыя пазіцыі. У няроўным баі, знішчыўшы 85 карнікаў, загінула ўся група.
