Знакавыя аб’екты і вялікія прадпрыемствы. Якія новыя пункты з’явяцца на маршруце «Поезда Памяці»
20 чэрвеня, Мінск . У праекце БЕЛТА «Краіна гаворыць» на тэму «80-годдзе вызвалення Беларусі ад нямецка-фашысцкіх захопнікаў» член Савета Рэспублікі Нацыянальнага сходу Рэспублікі Беларусь восьмага склікання, першы сакратар Цэнтральнага камітэта ГА «БРСМ» Аляксандр Лук’янаў расказаў пра маршрут удзельнікаў праекта «Поезд Памяці» і пра новыя пункты.
Расказваючы аб тым, які будзе маршрут удзельнікаў праекта «Поезд Памяці», Аляксандр Лук’янаў адзначыў: «Першы апорны пункт, што кансалідуе не толькі беларусаў, але і многія краіны постсавецкай прасторы, гэта Брэсцкая крэпасць. 21-га чысла — афіцыйны старт, сустрэча поезда і сустрэча з Наталляй Іванаўнай Качанавай, якая ў адкрытым дыялогу дасць свой наказ удзельнікам праекта. Далей адбудзецца азнаямленчая праграма з Брэстам і ўдзел у начным мітынгу-рэквіеме і рэканструкцыі. Тыя, хто хоць раз быў на рэканструкцыі, ведаюць, што гэта эмацыянальна вельмі сур’ёзная кропка, якая дапамагае данесці нашым сябрам з іншых дзяржаў, праз што прайшла краіна. Асабліва для моладзі».
Першы сакратар ЦК БРСМ адзначыў, што хлопцы і дзяўчаты абавязкова наведаюць музей у Брэсцкай крэпасці.
«Адбудзецца і ўручэнне першай пуцёўкі студэнцкаму атраду Саюзнай дзяржавы. А мы помнім, што цяпер вядуцца работы на тэрыторыі Кобрынскага ўмацавання Брэсцкай крэпасці па ўзвядзенні рэспубліканскага цэнтра патрыятычнага выхавання моладзі. Каля 2,5 тыс. маладых людзей папрацавалі там ужо», — сказаў Аляксандр Лук’янаў, дадаўшы, што і сёння работа там прадаўжаецца.
«Работа (ідзе. — Заўвага БЕЛТА) на ніжніх узроўнях казарменных памяшканняў 125-га артпалка. Вялікая колькасць артэфактаў (знойдзена. — Заўвага БЕЛТА): ад куль, гільз, патронаў да абмундзіравання, нейкіх прадметаў, якія дапамогуць у пошукавай дзейнасці. Разгорнута археалагічная лабараторыя, — адзначыў ён. — Прапанавана ўсё, што знойдзена хлопцамі і дзяўчатамі, байцамі з атрадаў і добраахвотнікамі, пакінуць у музеі, у размяшчэнні патрыятычнага цэнтра».
Аляксандр Лук’янаў расказаў, што састаў «Поезда Памяці» заедзе і ў Гродна, дзе маладых людзей чакаюць экскурсіі, якія азнаёмяць школьнікаў з гісторыяй каралеўскага горада. На карце маршруту — і Хатынь, і Белавежская пушча, і шэраг вялікіх беларускіх прадпрыемстваў.
«Будуць наведаны знакавыя аб’екты, якія расказваюць пра вялікую гісторыю нашай беларускай дзяржавы, — сказаў Аляксандр Лук’янаў. — Гэта і такія вядомыя прадпрыемствы, як «Нафтан», «БЕЛДЖЫ», «Гомсельмаш». Вядома ж, вельмі важны сустрэчы моладзі, узаемадзеянне, абмен. Праграма вельмі насычаная. Уначы поезд перамяшчаецца, днём моладзь знаходзіцца ў пастаяннай актыўнасці».
Як заявіў першы сакратар ЦК БРСМ, у бягучым годзе будуць і новыя лакацыі. «З’явяцца новыя гарады па маршруце руху «Поезда Памяці». Вельмі шмат аб’ектаў, якія ўпершыню будуць наведваць хлопцы і дзяўчаты. Гэта перш за ўсё (Полацкі. — Заўвага БЕЛТА) Спаса-Ефрасіннеўскі манастыр, мемарыяльны комплекс ахвяр памяці фашызму «Пяскі», Полацкае кадэцкае вучылішча», — расказаў Аляксандр Лук’янаў, падкрэсліўшы, што лейтматывам праекта з’яўляецца святкаванне 80-годдзя вызвалення Беларусі ад нямецка-фашысцкіх захопнікаў. Ён дадаў, што тэматычны тэлеграм-канал удзельнікаў праекта «Поезд Памяці» ўжо аб’яднаў больш за 15 тыс. маладых людзей.
*Праект створаны за кошт сродкаў мэтавага збору на вытворчасць нацыянальнага кантэнту
