«Галоўнае — настрой і камандны дух». Беларускія журналісты спаборнічаюць на спартакіядзе ў «Стайках»
Больш за 500 прадстаўнікоў СМІ з усёй рэспублікі сабраліся ў Рэспубліканскім цэнтры алімпійскай падрыхтоўкі «Стайкі» на рэспубліканскай спартакіядзе «Здароўе». Кожны з іх прыехаў даказаць, што можа быць першым не толькі ў падачы навін, але і ў спорце.
Каманда Беларускага тэлеграфнага агенцтва прымае самы актыўны ўдзел у спаборніцтвах.
Генеральны дырэктар БЕЛТА Ірына Акуловіч адзначыла, што спаборніцтвы яднаюць калектыў і ў цэлым усіх журналістаў. «Гледзячы на гэты стадыён, я рада бачыць такую вялікую колькасць свайго любімага бірузовага колеру і белых кепак з лагатыпам БЕЛТА. Для мяне важна, што тут не толькі наша каманда, але і балельшчыкі, — адзначыла Ірына Акуловіч. — Наша асноўная задача — рабіць навіны. У нас была насычаная працоўная ноч, калі мы адпісвалі спачатку тэлефонную размову Аляксандра Рыгоравіча з Трампам, потым сустрэчу Пуціна з Трампам. Перакладалі, рабілі пасты, працавалі ва ўсіх сетках. Так, у прынцыпе, і павінна працаваць агенцтва. І, тым не менш, сёння каманда тут. Я не стаўлю перад імі задачу перамагчы, для мяне важна, каб мы ўсе былі разам. Але і спартыўны дух павінен быць. І сам Прэзідэнт задае тон — асабістым прыкладам ён паказвае нам, што мы павінны быць спартыўнай нацыяй. Трэба спрабаваць першымі бегчы, лепш гуляць — гэта ўсё яднае людзей. А самае галоўнае — настрой, камандны дух і разуменне таго, што беларусы — спартыўная нацыя».
Атмасфера свята, сяброўскіх сустрэч і нефармальных стасункаў падкупляе кожнага. Так і карэспандэнт газеты «Рэспубліка» Ягор Дулевіч, будучы на спартакіядзе ўпершыню, ужо гатовы і ў наступным годзе прыняць удзел. «Я пад вялікім уражаннем, такога маштабу не чакаў. Эмоцыі выключна станоўчыя. Мне прыемна стаць часткай каманды яшчэ і ў нефармальным плане, а не толькі як журналіст. Гэта вельмі весела, — усміхаецца хлопец. — А яшчэ для мяне гэта выдатная магчымасць пазнаёміцца з калегамі з іншых калектываў, бліжэй пазнаць сваіх калег».
Карэспандэнт БЕЛТА Арцём Апановіч абараняў гонар агенцтва ў валейболе. «Гэта выдатная нагода сустрэцца як са сваімі калегамі, так і з іншых СМІ. Мне падабаецца праводзіць час разам з імі. Не працуючы пры гэтым, — жартуе Арцём. — Цікава і паўдзельнічаць у спаборніцтвах. Незалежна ад вынікаў. Гэта відовішчная падзея. Я быў і ў мінулым годзе, і ў наступным таксама запішуся ў каманду».
Сёння 20 каманд паказваюць свае здольнасці ў лёгкаатлетычным кросе, дартсе, валейболе, міні-футболе, настольным тэнісе, гіравым спорце. Кожнай хочацца перамагчы.
Дырэктар МТРК «Мір» Вольга Шпілеўская падкрэсліла, што каманда тэлерадыёкампаніі настроена выключна на перамогу і прыехала за ёю. «Мір» заўсёды за ўдзел, але мы ездзім менавіта перамагаць. Усё, што мы можам зрабіць, — зробім. Я ведаю, што хлопцы і дзяўчаты настроены па-баявому. У нас нешматлікая арганізацыя, але сёння мы амаль усе ў зборы: і спартсмены, і балельшчыкі. Нягледзячы на тое, што мы маленькія, мы сёння вельмі шматлікія. І па тым, як мы ідзём, я думаю, што ўсё ў нас атрымаецца, — сказала Вольга Шпілеўская. — Няхай гэта і спаборніцтвы, але, тым не менш, яны паказваюць, што нашы дзяржСМІ — гэта адна вялікая каманда. Я ж яшчэ прадстаўляю і Беларускі саюз жанчын, пярвічкі якога ёсць у кожным дзяржСМІ. Мы за ўсіх балеем і перажываем. Яшчэ здорава, што ёсць асобна дысцыпліны для кіраўнікоў, у якіх яны павінны паказаць сваю меткасць, мэтанакіраванасць і прыклад усёй камандзе, якая ідзе за імі. Таму для кіраўнікоў гэта асаблівыя выпрабаванні».
Вядучы спецыяліст тэлеканала «Беларусь 5» Ілья Гунько прадстаўляе каманду Белтэлерадыёкампаніі, якая ў мінулым годзе стала пераможцам спаборніцтваў, і заяўляе, што сёлета яны настроены зноў заняць самую высокую прыступку п’едэстала. «Вядома ж, мы ў гэтым годзе зноў прыехалі за перамогай. У мінулым годзе атрымалася, і хочацца трымаць такі ж тэмп. Мы рыхтаваліся да спаборніцтваў, трэніраваліся пастаянна, — сказаў ён. — Гэта даволі цікавая падзея нават акрамя спаборніцтваў — пазнаём новых людзей. Тут сабраліся ўсе СМІ краіны, і цікава ўбачыць, з кім робім разам навіны».
Калі гаварыць аб падтрымцы, то самымі гучнымі і актыўнымі, аб’ектыўна, стала наша група падтрымкі. Яркія шарыкі, бліскучыя пампоны і гучныя крычалкі — тое, чым запомніліся белтаўскія балельшчыкі.
Намеснік галоўнага рэдактара галоўнага выпуску Таццяна Салаўёва ўпершыню прыехала ў «Стайкі» і засталася пад вялікім уражаннем. «Я палюбіла сваю каманду і арганізацыю яшчэ больш! Што датычыцца нас, то любому чалавеку патрэбна падтрымка. Калі ёсць дружны калектыў, ёсць каго і каму падтрымаць, то гэта радуе. Думаю, што нашы балельшчыкі нашу каманду натхняюць», — запэўніла яна.
У кожным кутку спаборніцтваў адчуваецца сапраўдная еднасць калег, прычым не толькі аднаго і таго ж калектыву. Удзельнікі не толькі на словах, але і справай даказваюць, што сёння саперніцтва сяброўскае і ўсе рады ўбачыць адзін аднаго ў такой атмасферы.
Карэспандэнт «Гомельскай праўды» Уладзіслава Супруноўская расказала, што рэгіянальныя СМІ прыехалі на спаборніцтвы яшчэ ўчора і раней за іншых паспелі пазнаёміцца адзін з адным. «Гэта суперкам’юніці, што аб’ядноўвае нас не толькі ў рабоце. Для нас гэта магчымасць наладзіць кантакты, а таксама нефармальныя стасункі з калегамі. Асабліва каштоўна паразмаўляць з вопытнымі прадстаўнікамі рэспубліканскіх СМІ, атрымаць ад іх парады. Класна яшчэ і тое, што нараўне з тымі ж карэспандэнтамі тут прысутнічаюць і ўдзельнічаюць у спаборніцтвах кіраўнікі. Гэта ўражвае! Да таго ж яны не стаяць і проста глядзяць, яны шчыра балеюць за каманду, падтрымліваюць кожнага ўдзельніка», — падзялілася дзяўчына.
І, безумоўна, падтрымка для нашых спартсменаў вельмі важна. Для многіх сённяшні дзень можа закончыцца сарванымі галасамі, але ніхто не шкадуе, што прыехаў сёння ў «Стайкі». Асобнай увагі заслугоўваюць жонкі, мужы і дзеці ўдзельнікаў, якія не змаглі застацца ўбаку і якраз цяпер балеюць за сваіх родных.
Марына Важнік прыехала на спартакіяду з дзвюма дочкамі (пяць гадоў і два месяцы) падтрымаць мужа Андрэя, які прадстаўляе каманду Дома прэсы. «Сёння ўбачыла, што нашы прадстаўнікі СМІ актыўныя і хуткія не толькі ў рабоце, але і ў спорце. Яны, мне здаецца, могуць усё! Але сёння мы балеем толькі за Дом прэсы і спадзяёмся на іх перамогу», — дадала дзяўчына.
Аглядальнік газеты «7 дней» БЕЛТА Аляксей Гарбуноў перакананы ў непахіснасці духу саперніцтва белтаўскай каманды. «Тут незвычайная спартыўная атмасфера. Усе гуляюць, спаборнічаюць. Відаць, што людзі хочуць дабіцца поспеху, прынесці ўдачу свайму СМІ, — гаворыць Аляксей. — Я ўвесь дзень правёў на футбольным стадыёне, дзе гуляе наша каманда. Гуляе абсалютна фантастычна, паказвае такую гульню, якую не заўсёды ўбачыш нават у прафесійным футболе. Я ўжо сарваў голас, але балею і далей, а камандзе жадаю заняць прызавое месца».
Начальнік аддзела відэамантажу Першага нацыянальнага тэлеканала Яўген Нітаў выступае за каманду Белтэлерадыёкампаніі і прыехаў у «Стайкі» з сям’ёй — жонкай і дачкой. Для яго гэта самая лепшая падтрымка і матывацыя выкладацца на максімум. «Мы ездзім кожны год, таму што вельмі важна падтрымліваць сваю каманду, змагацца за перамогу. Гэта класнае і карыснае баўленне часу. І езджу я з сям’ёй — прывучаем дачку да актыўнага і спартыўнага ладу жыцця, — сказаў ён. — Прыемна на гэтай лакацыі сустрэцца таксама з калегамі з рэгіёнаў. З некаторымі мы знаёмы з мерапрыемстваў, але тут зусім інакш усё адчуваецца».
Дырэктар ТРК «Пінск» Аляксандр Бут-Гусаім адзначыў высокі ўзровень мерапрыемства і падрыхтоўку ўдзельнікаў. «Я гуляю за зборную каманду Брэсцкай вобласці. Асабліва прыемна, што ёсць такая магчымасць, каб не сядзець, умоўна, за рабочымі сталамі, а актыўна правесці час. Адчуваецца камандны дух, з’яднанасць. Упэўнены, што і ў далейшай рабоце гэта нам спатрэбіцца», — сказаў ён.
Самыя яркія, эпічныя і запамінальныя моманты сёння лавіў вядучы фотакарэспандэнт БЕЛТА Ян Гарбанюк. «Сёння я пераканаўся, што БЕЛТА ўмее і працаваць, і адпачываць, і ўдзельнічаць у спартыўных спаборніцтвах. Тут і футбол, і валейбол, і тэніс, у якіх хлопцы і дзяўчаты паказваюць добрую і сумленную барацьбу. Яшчэ і ўпершыню сёння здымаў сваіх калег, што запомніцца надоўга, — усміхаецца Ян. — Калег за гульнёй я яшчэ не здымаў. Гэта прыемна і надае нейкі азарт і жаданне злавіць самы лепшы момант у аб’ектыве».
Намеснік генеральнага дырэктара БЕЛТА Мікалай Цагалка адзначыў падрыхтаванасць каманды і зараджанасць на добрую гульню. «Наша каманда самая дружная, паказвае дастойныя рэзультаты. Спадзяюся, што з кожным годам мы будзем станавіцца толькі лепш. Хочацца выказаць падзяку супрацоўнікам за іх адданасць агенцтву і за самую лепшую барацьбу», — сказаў ён.
Вынікі спартакіяды стануць вядомы 17 жніўня.
Фота Яна Гарбанюка
